Samsett mynd/mbl.is/Sonja/Tölvuteikning/Þjóðarhöllin ehf.
Þorgerður Katrín Gunnarsdóttir, utanríkisráðherra og handboltaáhugamanneskja, fagnar framvindu uppbyggingaráforma Þjóðarhallar í Laugardal, en með ákvörðun Þjóðarhallar ehf. um að fela teymi Íslenskra aðalverktaka hf. að sjá um framkvæmd verkefnisins frá upphafi til enda sér loks fyrir endi á ferlinu, sem dregist hefur töluvert á langinn.
„Þetta eru náttúrulega stórkostlegar fréttir og þessi framkvæmd kemur lika á svo hárréttum tíma,“ segir Þorgerður í samtali við mbl.is.
„Þessi áform um að hefja framkvæmdir í haust eru góð fyrirheit, og boða gott fyrir handboltann, körfuna og fimleika og fleiri íþróttir og undirstrika um leið hvað við erum framarlega á mörgum sviðum sem íþróttaþjóð. Þannig að ég er bara alsæl, og alveg ótrúlega stolt af þessu.“
Dýrmætt fyrir margra hluta sakir
Í gær var tilkynnt að Þjóðarhöll ehf. hefði samþykkt tilboð Íslenskra aðalverktaka hf. að framkvæmdinni, og samhliða því voru tölvuteikningar af húsinu kynntar. Áformað er að framkvæmdir við bygginguna hefjist í haust og að þeim ljúki á vormánuðunum 2030, en alls nemur áætlaður kostnaður við framkvæmdirnar 16,8 milljörðum.
Þorgerður segir samstarfsfélaga sína í ríkisstjórn hafa rætt Þjóðarhöllina í morgun, og að þar hafi ríkt kampakæti yfir áformunum. Sjálf sé hún alsæl yfir þeim og jafnframt ótrúlega stolt.
„Það vita það allir að ég er mikil handboltamanneskja, og ekki bara af því að ég er mamma Gísla. Ég hef sjálf tekið þátt í handbolta og á ýmsum sviðum og finn hvað þetta er gríðarlega miklvægt fyrir okkur sem þjóð,“ segir hún.
„Þetta er svo dýrmætt fyrir margra hluta sakir og þetta er til dæmis hluti af því að vera tilbúin í heimsmeistaramótið í handbolta 2031 sem verður að hluta til haldið hérna heima.“
Miklu máli skipti að vera með fyrirtaksaðstöðu þegar þar að komi og geta stolt tekið á móti einum milliriðli keppninnar þegar þar að kemur.
Á myndinni má sjá tölvugerð af því hvernig handboltaviðureign í Þjóðarhöllinni kynni að líta út. Miklu máli skipti að vera með fyrirtaksaðstöðu þegar HM í handbolta rennur upp árið 2031 að sögn Þorgerðar.
Tölvuteikning/Þjóðarhöll ehf
Fjárfestingar í mannvirkjum skili sér í aukinni iðkun
Aðspurð um það hvort hún telji að uppbygging þessa mikla leikvangs muni koma til með að kynda undir iðkun á þeim íþróttum sem höllin mun hýsa segist Þorgerður telja að handbolta-, körfubolta- og fimleikaiðkun muni tvímælalaust njóta góðs af höllinni.
„Það hefur alltaf sýnt sig, ef við förum aðeins yfir söguna, að fjárfestingar í íþróttamannvirkjum hafa síðan skilað sér út í meiri notkun og við sáum það bara til dæmis þegar KSÍ fór að reisa litlu gervigrasvellina á sínum tíma,“ segir hún.
Með tilkomu gervigrasvallanna segir Þorgerður ákveðna hugarfarsbreytingu hafa orðið meðal landans.
mbl.is/Golli
Það hafi haft með sér í för ákveðna hugarfarsbreytingu landans gagnvart fótboltaíþróttinni að nú væri hægt að iðka hana utandyra allan ársins hring, og að sögn Þorgerðar hefur einnig aukinnar íþróttaiðkunnar gætt þar sem knattspyrnuhallir hafa verið byggðar.
„Núna mun þetta skref tvímælalaust hjálpa bæði handbolta og körfunni og fimleikunum líka, þannig að þetta eru spennandi tímar fyrir íslenskt íþróttalíf,“ segir hún og bætir því við að svo þurfi að halda áfram að styðja við íþróttirnar með ráðum og dáð.
Þorgerður segir að skrefið muni tvímælalaust styðja við iðkun íþrótta á borð við handbolta, körfubolta og fimleika. Á myndinni má sjá tölvugerða svipmynd af því hvernig körfuboltaviðureign í Þjóðarhöllinni kynni að líta út.
Tölvuteikning/Þjóðarhöll ehf
Read the full article at Morgunblaðið / mbl.is →
IS