Increased corporate contribution to tenants

Frumvarpið var lagt fram af Ragnar Þór Ingólfssyni, félags- og húsnæðismálaráðherra.

mbl.is/Anton Brink

Frumvarp sem felur í sér hækkun stofnframlaga ríkisins til óhagnaðardrifinna leigufélaga hefur verið samþykkt á Alþingi.

Greidd voru atkvæði um frumvarpið í upphafi þingfundar nú í morgun. 35 þingmenn ríkisstjórnarflokkanna kusu með frumvarpinu en sjö þingmenn Miðflokksins greiddu atkvæði gegn því. 13 greiddu ekki atkvæði og var þar um að ræða þingmenn Sjálfstæðisflokks og Framsóknar.

Almennt stofnframlag ríkisins hefur til þessa numið 18% af stofnvirði íbúðar en með lögunum er prósentuhlutfallið hækkað þannig að það geti numið allt að 23%. Frumvarpið var lagt fram af Ragnari Þór Ingólfssyni, félags- og húsnæðismálaráðherra.

Viðbótarframlög hækkuð að auki

Var frumvarpið lagt fram sem hluti af fyrsta aðgerðapakka ríkisstjórnarinnar í húsnæðismálum. Með lögunum er viðbótarframlag ríkisins, sem ætlað er námsmönnum og öryrkjum, einnig hækkað úr 4% í 5%.

Slíkt viðbótarframlag stendur nú einnig til boða ef atvinnuhúsnæði er umbreytt í íbúðarhúsnæði. Óheimilt verður að hafa eigendaskipti á íbúð sem veitt hefur verið viðbótarframlag nema til endurgreiðslu þess komi.

Í greinargerð með frumvarpinu er því haldið fram að lögin hafi ekki fjárhagsleg áhrif á ríkissjóð þar sem kostnaðaraukinn rúmist innan fjárheimilda til stofnframlaga samkvæmt fjárlögum.