Ólafur Ólafs got the foul word

Körfuboltamaðurinn og Íslandsmeistarinn Ólafur Ólafsson úr Grindavík var í dag sæmdur heiðursmerki hinnar íslensku fálkorðu.

Halla Tómasdóttir forseti veitti Ólafi fálkaorðuna á Bessastöðum í dag, á þjóðhátíðardegi Íslands, en hann var í hópi fjórtán Íslendinga sem hlutu þennan mikla heiður að þessu sinni.

Í tilkynningu segir að Ólafur hljóti fálkaorðuna „fyrir forystuhlutverk fyrir sína heimabyggð á krefjandi tímum.“

Ólafur hefur verið fyrirliði og í fararbroddi hjá körfuboltaliði Grindavíkur síðustu ár þegar liðið hefur ekki aðeins þurft að berjast við önnur lið í mestu samkeppni í sögu efstu deildar hér á landi, heldur líka þurft að spjara sig í baráttu við náttúruöflin.

Grindavíkurliðið þurfti lengi að æfa og spila utan Grindavíkur, í kjölfar jarðhræringanna á Reykjanesi og rýmingu bæjarins þann 10. nóvember 2023, eins og fjallað var meðal annars um í verðlaunaþáttum þar sem Ólafur lék stórt hlutverk.

Þrátt fyrir þessa stöðu tókst Ólafi og félögum, með sterkt bakland og alla Grindvíkinga á bakvið sig, að halda úti einu besta körfuboltaliði landsins sem ekki aðeins sameinaði bæjarbúa heldur náði á endanum að landa Íslandsmeistaratitlinum í vor, eftir þrettán ára bið, með sigri gegn Tindastóli í eftirminnilegu úrslitaeinvígi.

Ólafur hefur skrifað undir nýjan samning við Grindavík og mun spila áfram með liðinu næstu tvö árin.