Fornleifafræðingar hafa nú afmarkað svæði, sem spannar nokkra tugi ferkílómetra, þar sem Höfðaskipið sem sökk árið 1682 kann að leynast. Byrjað verður að skanna sjávarbotn svæðisins í sumar í von um að finna flakið.
„Það er stór áfangi að vera komin með þessi kort og það er ofboðsleg vinna á bak við þau. Þau þurfa að vera mjög nákvæm því við getum ekki bara ætt af stað og byrjað að mæla,“ segir fornleifafræðingurinn Steinunn Kristjánsdóttir sem fer fyrir rannsókninni í samstarfi við neðansjávarfornleifafræðinginn Ragnar Edvardsson.
Þrátt fyrir það er alls ekki víst að flakið leynist á svæðinu sem þegar hefur verið afmarkað.
„Við erum að renna svolítið blint í sjóinn með þetta, í orðsins fyllstu merkingu, þó að við séum bara frekar bjartsýn,“ segir hún.
„Þetta er fjársjóðsleit, ég viðurkenni það alveg “
Fyrsti liður verkefnisins er einfaldlega að staðsetja skipið en Steinunn segir að það myndu vera mikil tíðindi ef það tekst. Í kjölfarið yrði svo ráðist í frekari rannsóknir á flakinu og farminum.
„Þetta er fjársjóðsleit, ég viðurkenni það alveg, þótt það hljómi ekki mjög vísindalega. Við erum náttúrulega að reyna að sjá hvað var þarna um borð.“
En hvað er talið að hafi verið um borð í skipinu?
„Það er ekki vitað nema að í samtímaheimildum segir að aldrei hafi sokkið skip með jafn miklum verðmætum um borð á Íslandi eins og þarna,“ segir Steinunn. Þá er vitað að Hannes Þorleifsson handritasafnari hafi verið um borð og að öllum líkindum allt handritasafn hans.
„Það er vitað að það voru mjög merkileg handrit um borð og þar á meðal afrit af Sturlungu sem vitað var að var til á Þingeyrum,“ segir Steinunn.
Lestu umfjöllunina í heild sinni:
Nánar um málið í Morgunblaðinu
Áskrifendur:
Nánar um málið í Morgunblaðinu
Áskrifendur:
Read the full article at Morgunblaðið / mbl.is →
IS