Tickets on sale for the Handball World Cup today

Ljóst er að færri komast að en vilja til að sjá karlalandslið Íslands í handbolta á HM í Þýskalandi í janúar. HSÍ hefur þó orðið sér úti um hundruð miða sem fara í sölu í hádeginu í dag.

HSÍ greinir frá því í tilkynningu að miðasala hefjist klukkan 12 í gegnum Stubb. Hlekkur á miðasöluna mun verða birtur á miðlum HSÍ þegar salan opnar.

Ekki er þó hægt að kaupa miða á alla leiki Íslands því uppselt er á leik Íslands í milliriðli 23. janúar, komist liðið þangað eins og búast má við.

Hægt verður að kaupa miða á eftirfarandi leiki Íslands í H-riðli sem leikinn verður í Magdeburg:

15. janúar 2027

Ísland – Barein

17. janúar 2027

Ísland – Japan

19. janúar 2027

Ísland – Norður-Makedónía

Auk þess verða miðar í boði á eftirfarandi leiki í milliriðli í Hannover:

21. janúar 2027

Fyrsti leikur Íslands í milliriðli

25. janúar 2027

Þriðji leikur Íslands í milliriðli

Ef Ísland kemst áfram í milliriðil, en þangað fara þrjú efstu lið hvers riðils, mun liðið spila við liðin þrjú sem enda efst í G-riðli (Danmörk, Slóvenía, Bandaríkin og Angóla).

HSÍ vekur athygli á því að aðeins er hægt að kaupa miða á staka leiki og er miðafjöldi takmarkaður. Samkvæmt upplýsingum Vísis eru allt frá 100 til 1.000 miðar í boði á hvern leik.

Börn fjögurra ára og yngri þurfa ekki að kaupa miða.

Þegar miðakaupum er lokið í gegnum Stubb geta liðið nokkrir dagar þar til miðarnir berast á það netfang sem gefið er upp við kaup. Afhendingartími ræðst af álagi hverju sinni og eru stuðningsmenn beðnir um að sýna biðlund.