LS Retail hefur fest kaup á fyrirtækjunum K3 Global Accounts og K3 Unisoft sem áður tilheyrðu Xpert Business Solutions Group (XBSG). Þessar tvær rekstrareiningar voru lengi hluti af K3 Business Technology Group. Kaupferlinu lauk formlega í dag.
K3 Global Accounts er með starfsstöðvar í Hollandi og Singapúr og sér um hugbúnaðar- og sérfræðiþjónustu hjá Inter IKEA Systems og IKEA einkaleyfishöfum í 32 löndum. Hugbúnaðarlausnir þeirra byggja á Microsoft Dynamics 365 Business Central og CRM, ásamt verslunarlausnum frá LS Retail. Að auki býður fyrirtækið upp á margvíslegar eigin lausnir á sviði rafrænna viðskipta, fartækja og samþættinga, að því er segir í tilkynningu.
K3 Unisoft var stofnað árið 1985 og er með höfuðstöðvar í Hollandi. Meginstarfsemin felst í að selja og þjónusta verslunarlausnir fyrir lítil og meðalstór fyrirtæki í Benelux-löndunum, meðal annars viðskipta- og kassakerfi, skýrslukerfi auk samþættinga.
Kristján Jóhannsson.
Ljósmynd/Aðsend
„Þessi kaup eru stórt skref í þróun LS Retail og þjónustu okkar við lykilviðskiptavini fyrirtækisins. Við höfum unnið með IKEA verslunum um allan heim í rúm 25 ár í samvinnu við K3 Global Accounts og þetta skref mun auka tækifæri okkar til útbreiðslu þróaðra verslunar- og veitingalausna til stórfyrirtækja sem vilja hagnýta sér nýjustu tækni,” segir Kristján Jóhannsson, forstjóri LS Retail, í tilkynningunni.
„Við hlökkum til að starfa með K3 Global Accounts með það að markmiði að þjónusta stór, alþjóðleg fyrirtæki og bjóðum nýtt fólk velkomið í hópinn. Með kaupum á þessum tveimur fyrirtækjum stækkar LS Retail um allt að 15%. Starfsmannafjöldi fer yfir 350 manns og velta verður um 100 milljónir evra eða meira en 14 milljarðar ISK. Höfuðstöðvar LS Retail eru á Íslandi og skrifstofur í Portúgal, Malasíu og Dúbaí auk þess að vera með starfsfólk í heimaskrifstofum í 25 löndum. Með þessari sameiningu bætast við tvær starfstöðvar, önnur í Hollandi sem mun styrkja stöðu LS Retail enn frekar í Evrópu og hin í Singapúr sem mun styðja við vöxt á Asíu mörkuðum,“ segir Kristján jafnframt.
Read the full article at Morgunblaðið / mbl.is →
IS