Police on the rise: "No place, no time"

Lögreglan á Blönduósi er með á sínu borði mál sem kom upp í Víðigerði í gær þegar ökumaður jeppa tók fram úr bílalest með þeim afleiðingum að ökumenn tveggja bifreiða úr gagnstæðri átt þurftu að aka út af veginum til að forða sér frá slysi. Litlu mátti muna að alvarlegur árekstur yrði.

Að sögn Þórhildar Völu, varðstjóra hjá lögreglunni á Blönduósi, ætlar lögreglan að skoða málið.

Fólk duglegt við að tilkynna

Spurð hvort hægt sé að sekta ökumanninn eftir á segir hún lögregluna hafa völd til þess en óvíst sé hvernig þetta mál muni fara. Framúrakstur sem þessi fylgi sumartímanum og því miður sé þolinmæði ökumanna ekki alltaf eins og hún ætti að vera. Bætir hún við að þegar svona tilvik komi upp sé fólk duglegt við að tilkynna lögreglunni um þau.

„Framúrakstur er alltaf hættulegur. Þetta er ákveðin áhætta sem fólk er tilbúið að taka en við myndum aldrei mæla með því ef fólk er að leggja líf sitt og annarra í hættu með óþarfa framúrakstri. Þetta var slíkt tilvik að þetta var hvorki staður né stund,” segir Þórhildur Vala.

Bílar þurftu að keyra út af veginum til að forðast árekstur.

Ljósmynd/Aðsend

Spurð hvort hraðakstur hafi aukist í umdæmi lögreglunnar á Blönduósi segir hún að fólk sé almennt séð skynsamara í umferðinni en á árum áður og blessunarlega sé hraðakstur ekki eins mikill, þótt hann aukist alltaf með hækkandi sól.