Fyrstur til að fara yfir Héraðsvatnabrú í dag var Gamli Ford, árgerð 1930.
Ljósmynd/Pétur Ingi Björnsson
Félagar í Heldribílaklúbbi Skagafjarðar fylktu liði á fallegum vélfákum sínum í dag og óku yfir gömlu Héraðsvatnabrúna við Vesturósinn. Tilefnið var 17. júní og 100 ára afmæli brúarinnar, sem tekin var í notkun í júlí árið 1926. Jafnlangt er síðan fyrsti bíllinn kom til Skagafjarðar.
Fornbílaeigendur í Skagafirði hafa lengi haft þann sið að viðra bíla sína á þjóðhátíðardeginum, sjálfum sér og ekki síst öðrum til yndisauka og ánægju. Að þessu sinni var ákveðið að fara akandi yfir gömlu brúna, sem öllu jafna er notuð sem göngu- og reiðbrú í dag. Gaf Vegagerðin heimild fyrir akstrinum.
Fyrstur bíla í dag yfir brúna var Gamli Ford, K-230, árgerð 1930, sem Björn heitinn Sverrisson, bílasmiður á Sauðárkróki, gerði upp á sínum tíma. Björn gerði upp fjölda merkilegra bíla en Fordinn er nú í eigu sonar hans, Sigurbjörns Björnssonar.
Áð á slóðum Jóns Ósmanns
Bílarnir hjá klúbbmeðlimum eru af ýmsum gerðum og stærðum, og aldurinn misjafn þó flestir séu komnir vel til ára sinna. En útlitið er betra en á mörgum nýrri bíla nútímans. Auk þess að aka yfir 100 ára Héraðsvatnabrúna var stoppað á Furðuströnd, við vesturósinn, þaðan sem ferjumaðurinn Jón Ósmann fór forðum daga á dragferju sinni áður en brúin kom til sögunnar.
Fjallað er ítarlega um þennan viðburð Heldribílaklúbbsins á vef héraðsfréttablaðsins Feykis . Og meðfylgjandi myndir tók Pétur Ingi Björnssonar Sverrissonar bílasmiðs.
Brúin yfir vesturós Héraðsvatna var vígð í júlí 1926, en var fánum prýdd fyrir hópaksturinn í dag og vel skreytt. Tindastóll í bakgrunni.
Ljósmynd/Pétur Ingi Björnsson
Brúin er notuð sem göngu- og reiðbrú í dag en núverandi brú er aðeins sunnar í ósnum.
Ljósmynd/Pétur Ingi Björnsson
Ljósmynd/Pétur Ingi Björnsson
Farþegar með fornbílunum klæddu sig sumir upp í tilefni 17. júní.
Ljósmynd/Pétur Ingi Björnsson
Bílarnir stoppuðu á Furðuströnd þar sem eru minjar eftir ferjumanninn Jón Ósmann, en hann ferjaði fólk yfir vesturósinn áður en Héraðsvatnabrúin kom til sögunnar 1926.
Ljósmynd/Pétur Ingi Björnsson
Read the full article at Morgunblaðið / mbl.is →
IS