Á stuttum tíma hafa tvær árásir verið gerðar á flugvöllinn.
Skjáskot/X
Að minnsta kosti 13 hermenn og óbreyttir borgarar létu lífið í árás á Diori Hamani-flugvöllinn í Níamey, höfuðborg Níger. Stutt er síðan íslamiskir hryðjuverkamenn gerðu árás á flugvöllinn.
22 árásarmenn voru felldir af öryggissveitum vallarins sem og hermönnum sem sendir voru á staðinn. Stóð árásin yfir í marga klukkutíma.
Níger hefur í þrjú ár verið undir herforingjastjórn sem hefur átt í erfiðleikum með að beisla ofbeldi íslamskra vígasveita sem hefur hrjáð landið í um áratug.
Leit stendur nú yfir að vígamönnum sem flúðu frá bardaganum og inn í íbúahverfi nálægt flugvellinum. Samkvæmt upplýsingum AFP hjálpa íbúar hermönnum við leitirnar vopnaðir spýtum og sveðjum.
Samkvæmt upplýsingum frá yfirvöldum í Níger er flugvöllurinn öruggur og tekur enn þá við flugumferð. Þó hafa mörg flug beint stefnu sinni annað.
Önnur árás á stuttum tíma
Í janúar var einnig ráðist á flugvöllinn og herstöð í nágrenni við hann. Þá tók íslamskur vígahópur ábyrgð á þeirri árás.
Nígerskum hersveitum tókst þá með rússneskri hjálp að stöðva árásarmennina. 20 vígamenn voru drepnir og særðust 4 hermenn í árásinni í janúar.
Flugvöllurinn er sagður afar viðkvæmur en í desember og janúar sat stór sending úraníums föst á vellinum og beið flutnings. Ekki er vitað hvort úraníumið hafi síðan þá verið flutt á brott.
Aukið öryggi ekki nægilegt
Síðustu vikur hefur verið unnið að því að rífa hús í fátækrahverfum í kringum völlinn þar sem stjórnvöld telja hryðjuverkamenn dvelja í þeim. Einnig hefur öryggi á vellinum verið stóraukið. Árásin í dag sýni þó fram á að þessar aðgerðir hafi ekki dugað.
Talið er að sami hópur standi fyrir árásinni í dag og þeirri í janúar. Sami hópur hefur einnig tekið ábyrgð á fjölda annarra árása á svæðinu.
Read the full article at Morgunblaðið / mbl.is →
IS