The headstone is carried in a police van

Valgerður Árnadóttir, formaður Hvalavina.

mbl.is/Eyþór

Hólmsteinn Harðarsson var að sögn Valgerðar Árnadóttur, formanns Hvalavina, færður inn í lögreglubíl er hann var kominn niður úr mastri hvalveiðiskipsins Hvals 9.

Valgerður segir að óheimilt sé að sigla af stað með farþega sem hefur ekki gefið samþykki. Þá vill hún meina að Hólmsteinn hafi ekki talið sig vera að gefa samþykki fyrir siglingunni er hann gaf áhöfn hvalveiðiskipsins kennitölu sína og nafn.

„Hann var ekki upplýstur um að það væri til þess að setja hann á farþegaskrá,“ segir hún.

Áhöfnin skráði Hólmstein samt sem áður sem farþega skipsins og sigldi af stað með hann í tunnu mastursins á Hval 9 frá Reykjavíkurhöfn til Hvalfjarðar.

Segir siglinguna óheimila

Valgerður segist hafa ráðfært sig bæði við lögfræðinga og skipstjóra sem hún þekkir til og hafi fengið þær upplýsingar að „þetta mætti ekki gera“.

Bætir hún við að skipstjórar eigi að vita hvað megi og megi ekki og að Hólmsteini hafi augljóslega ekki verið veittar þær upplýsingar eða þjálfun sem farþega skips skal veita.

Hólmsteinn í lögreglubíl

Þegar blaðamaður mbl.is ræddi við Valgerði sagðist hún sjálf vera að elta lögreglubíla að lögreglustöðinni á Akranesi.

Hólmsteinn sé þá í einum lögreglubílanna. Enn hefur hún ekki sjálf náð tali af honum síðan í Reykjavíkurhöfn.