The risk of death for young women is unprecedented

Bólusetning gegn HPV-veirunni hófst hérlendis árið 2011.

AFP

HPV-bóluefnið gegn leghálskrabbameini hefur gert það að verkum að nær engin hætta er á að konur undir þrítugu deyi úr sjúkdómnum.

Þetta kemur fram í rannsókn sem birt var í læknatímaritinu The Lancet í dag.

Á árunum 2020 til 2024 lést engin kona á Englandi á aldrinum 20 til 24 ára úr leghálskrabbameini. Þetta er í fyrsta sinn sem ekkert dauðsfall hefur verið skráð í þessum aldurshópi og er talið að bólusetningin hafi bjargað lífi tæplega 200 ungra kvenna.

Drengir nú bólusettir einnig

Auk þess að engin dauðsföll urðu á árunum 2020–24 fækkaði dauðsföllum einnig um 80 prósent í sama aldurshópi fjórum árum þar á undan, á milli 2015 og 2019, samkvæmt rannsókninni þar sem dánartíðni á landsvísu var skoðuð.

„Þökk sé HPV-bólusetningu og leghálsskimun er framtíð þar sem nánast engin fær leghálskrabbamein nú í augsýn,“ sagði Michelle Mitchell, framkvæmdastjóri Cancer Research UK sem fjármagnaði rannsóknina, í samtali við AFP-fréttaveituna.

Rannsóknin var unnin af hópi vísindamanna frá Queen Mary-háskólanum í Lundúnum en ráðist var í rannsóknina í kjölfar þess að Bretar hófu HPV-bólusetningu fyrir börn á aldrinum 12-13 ára.

Ástralir urðu árið 2007 fyrsta landið til þess að hefja HPV-bólusetningarátak í skólum en bólusetning gegn HPV-veirunni hófst árið 2011 á Íslandi. Fyrst voru eingöngu stúlkur bólusettar fyrir veirunni en drengir undir 18 ára aldri voru bólusettir hér á landi í fyrsta sinn í vetur.