Supreme Court commuted the death sentence in Akureyri

Konan lést á Akureyri í apríl árið 2024.

mbl.is/Þorgeir

Hæstiréttur hefur mildað dóm yfir manni sem varð sambýliskonu sinni að bana á Akureyri í apríl 2024. Maðurinn var dæmdur í 16 ára fangelsi í Landsrétti fyrir manndráp en Hæstiréttur taldi ekki fullsannað að hann hefði haft ásetning til að bana konunni.

Í stað manndráps var maðurinn sakfelldur fyrir stórfellda líkamsárás sem leiddi til bana vegna stórfellds gáleysis. Refsingin var lækkuð úr 16 árum í 14 ára fangelsi.

Hæstiréttur veitti áfrýjunarleyfi í málinu á þeim grundvelli að niðurstaðan kynni að hafa verulega almenna þýðingu. Sérstaklega var litið til þess að Héraðsdómur Norðurlands eystra og Landsréttur höfðu komist að ólíkri niðurstöðu um hvort maðurinn hefði haft ásetning til að bana sambýliskonu sinni. Héraðsdómur taldi sannað að maðurinn hefði beitt konuna grófu ofbeldi sem varð henni að bana en ekki að hann hefði haft manndrápsásetning. Landsréttur sneri þeirri niðurstöðu við og sakfelldi hann fyrir manndráp.

Beitti margþættu ofbeldi

Konan lést aðfaranótt 22. apríl 2024 eftir ofbeldi á heimili parsins á Akureyri. Samkvæmt dóminum hafði maðurinn beitt hana margþættu ofbeldi sem beindist meðal annars að höfði, hálsi, brjóstkassa, kviði og útlimum. Dánarorsök var alvarlegur áverki á efri garnahengisbláæð sem olli mikilli innvortis blæðingu.

Í niðurstöðu Hæstaréttar segir að þótt sannað sé að maðurinn hafi banað sambýliskonu sinni sé varhugavert að telja fram komna fulla sönnun fyrir því að hann hafi á verknaðarstundu haft ásetning til að valda dauða hennar. Rétturinn vísaði meðal annars til þess að ekki lægi fyrir nákvæmlega hvernig hinn banvæni áverki hefði verið veittur og að ekki yrðu dregnar afdráttarlausar ályktanir um manndrápsásetning af háttsemi mannsins fyrir eða eftir árásina.

Sakhæfur þrátt fyrir heilabilun

Hæstiréttur staðfesti jafnframt sakfellingu mannsins fyrir annað ofbeldisbrot gegn konunni sem átti sér stað í febrúar 2024. Þá var staðfest niðurstaða lægri dómstiga um að maðurinn væri sakhæfur þrátt fyrir að glíma við heilabilun. Fyrir dómi lágu bæði undir- og yfirmatsgerðir sérfræðinga og komust allir matsmenn að þeirri niðurstöðu að hann hefði verið sakhæfur þegar brotin voru framin.

Atvikið átti sér stað í fjölbýlishúsi.

mbl.is/Þorgeir

Heimilisofbeldi um langt skeið

Í dóminum kemur jafnframt fram að lögregla taldi líklegt að konan hefði sætt heimilisofbeldi af hálfu mannsins um áratugaskeið.

Við ákvörðun refsingar leit Hæstiréttur meðal annars til þess að ofbeldið hefði verið hrottafengið, að brotin hefðu verið framin á heimili parsins sem hefði átt að vera griðastaður brotaþola og að atlögurnar hefðu verið tilefnislausar. Maðurinn var dæmdur til 14 ára fangelsisvistar og kemur gæsluvarðhald sem hann hefur sætt frá 22. apríl 2024 til frádráttar refsingunni.