Passengers may lose access to a hand luggage compartment

Farþegar gætu misst aðgang að farangurshólfum ef þeir halda áfram að sækja handfarangur sinn við neyðarrýmingu.

Ljósmynd/Unsplash/Nathana Rebouças

Farþegar í flugi gætu átt á hættu að missa aðgang að farangurshólfum ef þeir halda áfram að tefja neyðarrýmingu með því að sækja handfarangur sinn.

Alþjóðasamtök flugfélaga (IATA) hafa hleypt af stokkunum nýju átaki undir yfirskriftinni „Bjargaðu lífi, ekki tösku“ (e. Save a Life, Not a Bag).

Markmiðið er að minna farþega á að skilja allan farangur eftir þegar rýma þarf flugvél og ganga tafarlaust að næsta nothæfa neyðarútgangi.

Átakið kemur í kjölfar könnunar sem IATA lét gera en þar kom fram að fjórir af hverjum tíu farþegum vissu ekki að þeim bæri að skilja eigur sínar eftir í neyðartilvikum.

Þá sögðust 80% farþega vita hvernig ætti að bregðast við í neyð en aðeins 61% nefndi réttilega að skilja ætti allt eftir um borð.

Sekúndur geta skipt sköpum

Nick Careen, yfirmaður öryggismála hjá IATA, segir að fyrst verði reynt að breyta hegðun farþega með fræðslu. Ef það dugi ekki til geti komið til harðari aðgerða, til dæmis sekta eða þess að farangurshólfum verði læst við neyðarrýmingu.

„Það getur stofnað lífi fólks í hættu ef aðeins einn eða tveir farþegar eyða nokkrum sekúndum í að ná í persónulega muni,“ sagði Careen.

IATA bendir jafnframt á að farþegar eigi ekki að nota síma til að taka upp eða mynda í neyðartilvikum, enda geti það tafið rýmingu og valdið þrengslum. Farþegar eru hvattir til að fylgjast vel með öryggiskynningum og geyma mikilvæga muni, svo sem vegabréf, lyf og peninga, á sér frekar en í handfarangri sem settur er í farangurshólf.

People